फुटबलको विश्व नियामक निकाय फिफाका वर्तमान अध्यक्ष जियानी इन्फान्टिनो आगामी मार्चमा हुने चुनावमा पुनः अध्यक्ष पदका लागि उम्मेदवारी दिने भएका छन्।
सन् २०१६ देखि फिफाको नेतृत्व सम्हाल्दै आएका इन्फान्टिनो पछिल्लो समय निकै दबाबमा छन्। उनले फिफाका विभिन्न प्रतियोगिताहरूको केही हिस्सा निजी लगानीकर्ता कम्पनीहरूलाई बेच्ने योजना अघि सारेपछि उनको चर्को आलोचना भएको थियो। यद्यपि, विरोधपछि उनले सो योजना रद्द गरिसकेका छन्।
इन्फान्टिनोको उक्त योजनाको युरोपेली फुटबल महासंघले कडा विरोध गरेको थियो। युइएफएले विश्वकपसहित फिफाका सबै प्रतियोगिताहरू बहिस्कार गर्ने चेतावनी समेत दिएको थियो।
फिफाले एक विज्ञप्ति जारी गर्दै भनेको छ, 'अध्यक्ष इन्फान्टिनोले २०२७ को चुनावमा पुनः उठ्ने घोषणा गत अप्रिलमै गरिसक्नुभएको हो। यसमा कुनै परिवर्तन भएको छैन, उहाँ चुनावी मैदानमा उत्रिनुहुनेछ।'
पोल्याण्डमा भइरहेको महिला यू-२० विश्वकपका क्रममा पत्रकारहरूले भविष्यका बारेमा सोधेको प्रश्नमा उनले कुनै जवाफ दिन मानेका थिएनन्। यदि ५६ वर्षीय स्विस नागरिक पुनः निर्वाचित भएमा उनले सन् २०३१ सम्म फिफाको नेतृत्व गर्नेछन्।
फिफा र युइएफएबीचको विवाद झन् चर्किएको छ। फिफाले युइएफएमाथि आफ्नो नेतृत्वविरुद्ध 'भ्रामक प्रचार' गरेको आरोप लगाएको छ। अर्कोतर्फ, युइएफएले फिफाको आर्थिक योजनाविरुद्ध अमेरिकामा कानुनी प्रक्रिया सुरु गरेको छ र स्विट्जरल्याण्डमा आपराधिक उजुरी हाल्ने चेतावनी समेत दिएको छ।
केही समय अघिसम्म इन्फान्टिनो सजिलै चुनाव जित्ने अनुमान गरिएको थियो। तर, पछिल्लो विवादपछि इङ्गल्याण्ड, स्कटल्याण्ड, वेल्स र आयरल्याण्डका फुटबल संघहरूले उनलाई दिएको समर्थन फिर्ता लिएका छन्।
युइएफएले इन्फान्टिनोविरुद्ध बलियो उम्मेदवार उठाउने तयारी गरिरहेको बुझिएको छ। चुनाव लड्नका लागि २११ सदस्य राष्ट्रमध्ये कम्तीमा १०६ राष्ट्रको समर्थन आवश्यक पर्छ। हालसम्म इन्फान्टिनोविरुद्ध कुनै पनि उम्मेदवारको नाम औपचारिक रूपमा घोषणा गरिएको छैन, तर उत्तर अमेरिकी फुटबल महासंघका अध्यक्ष भिक्टर मोन्टाग्लियानीलाई बलियो प्रतिस्पर्धीका रूपमा हेरिएको छ।
चुनावका लागि उम्मेदवारी दर्ता गर्ने अन्तिम मिति आगामी नोभेम्बर १८ सम्म तोकिएको छ।
-1746009348.jpg)
